Deaths Due To Alcohol and Drug Use: दारू आणि अंमली पदार्थांच्या सेवनामुळे दरवर्षी 30 लाखांहून अधिक मृत्यू, बहुसंख्य पुरुष; WHO च्या अहवालात धक्कादायक खुलासा
![Image](https://mrst1.latestly.com/wp-content/uploads/2022/03/Death-380x214.jpg)
अल्कोहोल आणि आरोग्यावरील या ताज्या अहवालात म्हटले आहे की, जगभरात दरवर्षी 20 पैकी जवळजवळ एक मृत्यू दारूच्या सेवनामुळे होतो. हे मृत्यू दारूच्या नशेत वाहन चालवणे, दारू-संबंधित हिंसाचार आणि गैरवर्तन आणि विविध रोग आणि विकारांमुळे होतात.
जागतिक आरोग्य संघटनेने (WHO) दारू आणि अंमली पदार्थांबाबत धक्कादायक खुलासा केला आहे. डब्ल्यूएचओने मंगळवारी एक अहवाल सादर केला आणि सांगितले की, दारू आणि अंमली पदार्थांच्या सेवनामुळे दरवर्षी जगात तीन दशलक्षाहून अधिक मृत्यू होतात. या मृत्यूंपैकी, 2.6 दशलक्ष मृत्यू हे मद्यपानामुळे होते, जे सर्व मृत्यूंपैकी जवळपास पाच टक्के होते. अलिकडच्या वर्षांत या मृत्यूचे प्रमाण थोडे कमी झाले असल्याचेही आरोग्य संघटनेने सांगितले आहे. अहवालाबाबत जागतिक आरोग्य संघटनेने म्हटले आहे की, जरी आकडेवारी कमी होत असली तरी ती अजूनही 'न स्वीकारण्याजोगी उच्च' आहे. अल्कोहोल आणि आरोग्यावरील या ताज्या अहवालात म्हटले आहे की, जगभरात दरवर्षी 20 पैकी जवळजवळ एक मृत्यू दारूच्या सेवनामुळे होतो. हे मृत्यू दारूच्या नशेत वाहन चालवणे, दारू-संबंधित हिंसाचार आणि गैरवर्तन आणि विविध रोग आणि विकारांमुळे होतात. कमी उत्पन्न असलेल्या देशांमध्ये मृत्यूचे प्रमाण सर्वाधिक आणि उच्च उत्पन्न असलेल्या देशांमध्ये सर्वात कमी होते. मद्यसेवनामुळे 2019 मध्ये 2.6 दशलक्ष मृत्यू झाल्याचे अहवालात म्हटले आहे. त्या वर्षी अल्कोहोलमुळे मृत्यूचे सर्वाधिक प्रमाण 13 टक्के होते, ज्यात 20 ते 39 वर्षे वयोगटातील लोकांचा समावेश होता. आताची ही नवीनतम उपलब्ध आकडेवारी या वर्षी जगभरातील सर्व मृत्यूंपैकी 4.7 टक्के प्रमाण दर्शवते. या मृत्यूंपैकी जवळपास तीन चतुर्थांश पुरुष होते, असे अहवालात म्हटले आहे. साधारण 2010 पासून जगभरात अल्कोहोलचे सेवन आणि त्यामुळे होणाऱ्या हानीमध्ये काही प्रमाणात घट झाली आहे. अल्कोहोलच्या सेवनाचा आरोग्य आणि सामाजिक भार अस्वीकार्यपणे जास्त आहे. (हेही वाचा: ) भारतात 15 वर्षे आणि त्याहून अधिक वयाचे 31.2 टक्के लोक दारूचे सेवन करतात. यापैकी 3.8 टक्के असे लोक आहेत, ज्यांना त्याचे तीव्र व्यसन आहे आणि ते दररोज मोठ्या प्रमाणात मद्यपान करतात, तर 12.3 टक्के असे लोक आहेत जे अधूनमधून खूप दारू पितात. भारतात, 15 वर्षे आणि त्याहून अधिक वयाचे सुमारे 41 टक्के पुरुष दारू पितात, तर महिलांमध्ये ही संख्या 20.8 टक्के आहे. अहवालात असे आढळून आले आहे की मद्यसेवनामुळे लोकांना क्षयरोग, एचआयव्ही आणि न्यूमोनिया यांसारख्या संसर्गजन्य रोगांचा धोका वाढतो. या आरोग्यविषयक चिंता लक्षात घेऊन जागतिक आरोग्य संघटनेने आपल्या नवीन अहवालात दारू आणि ड्रग्जचे सेवन कमी करण्यावर आणि या गोष्टींच्या सेवनामुळे उद्भवणाऱ्या विकारांवर उपचार करण्यावर भर दिला आहे. सर्वोच्च आरोग्य एजन्सीचे म्हणणे आहे की, अनेक देशांनी अल्कोहोलच्या विक्रीवर काही निर्बंध लादले आहेत, परंतु ते खूपच कमकुवत आहेत.
0 Comments